Президенттин администрациясы "Ак илбирсти колдоо үчүн 23 мүнөт" акциясына катышты

Бүгүн, 23-октябрда Ак илбирстин эл аралык күнүнө карата президенттин администрациясынын кызматкерлери "Ак илбирсти колдоо үчүн 23 мүнөт" акциясына катышышты. Бул тууралуу мекеменин басма сөз кызматы кабарлады.

Маалыматка ылайык, иш-чара министрлер кабинетинин төрагасынын орун басары Эдил Байсаловдун жана президенттин 2023-2027-жылдарга тоолуу аймактарды өнүктүрүү боюнча иш-аракеттердин беш жылдыгын ишке ашыруу боюнча атайын өкүлү Динара Кемелованын катышуусунда өттү.

Акция Кыргызстандын туруктуу өнүгүү идеяларына жана жаратылышка аяр мамиле жасоого берилгендигин күбөлөндүрүп турат. Катышуучулар сейилдеп, ак илбирсти коргоо менен келечек муундар үчүн жашоонун, тең салмактуулуктун жана шыктануунун булагын сактап каларын эске салышты.

Айта кетсек, буга чейин президент Садыр Жапаров Ак илбирстин эл аралык күнүн эске салып, кайрылуу жолдогон. Анда коомчулукту сейилдөөгө, чуркоого же каалаган башка активдүү аракетке 23 мүнөт арноого чакырды.