Улуу Британиялык аял баш мээсине жасалган операция учурунда кларнетте ойноду (видео)

Улуу Британияда аял баш мээсине электроддор орнотулуп жаткан учурда кларнетте ойноду. Бул тууралуу Daily Mail басылмасы жазды.

69 жаштагы Дениз Бэкон 2014 жылдан бери Паркинсон оорусу менен ооруп келген. Оорудан улам анын кыймылы, бийлөөсү жана оркестрде ойноосу кыйынга турган. Кыймылдарын көзөмөлгө алуусу үчүн анын мээсине электроддор орнотулган.

Нейрохирург Кейумарс Ашкандын айтымында, бейтаптын баш сөөгүндө кичинекей тешиктер жасалып, электроддор орнотулган. Кол кыймылдары дароо жакшырган. Операция жергиликтүү наркоз менен жасалгандыктан, аял операция учурунда кларнетте ойногон.

"Стимуляция башталганда кол кыймылдары дароо жакшырды. Сол жак мээге электроддор орнотулганда, оң колдун кыймылы так болуп, ал эркин ойноду. Оң жакка орнотулгандан кийин да ошондой болду",- деген дарыгер.

Ал эми бейтап операция ийгиликтүү болгонун жана дароо жеңилдикти сезгенин билдирди.

"Стимуляциядан кийин оң колум жеңил кыймылдады, кайрадан кларнетте ойной алдым. Мен мурдагыга салыштырмалуу жакшы басам жана кайра бийлесем деген кыялым бар",- деди ал.

Аялдын көкүрөгүнө кайра кубатталуучу аппарат орнотулуп, ал мээге электр импульстарын берип турат. Ал 20 жылга чейин иштей алат жана мээ активдүүлүгүнө жараша стимуляция деңгээлин автоматтык түрдө жөнгө салат.