Пекин Кытай компанияларынын Европанын санкциялар тизмесине киргизилгенине нааразы болду

Кытай Евробиримдиктин Орусияга каршы 19-пакет санкцияларына өзүнүн айрым компанияларынын кошулганына байланыштуу расмий нааразылык билдирди. Бул тууралуу Кытайдын Тышкы иштер министрлигинин өкүлү Го Цзякунь Yicai порталына маалымдады.

"Биз бир нече жолу белгилегенбиз. Кытай Украин кризисинин себепкери эмес жана ага катышуучу да эмес", — деди дипломат.

Ал кошумчалагандай, Пекин ар дайым тынчтык жол менен сүйлөшүүлөрдү жүргүзүү жана ортомчулук кылуу аракетин колдоп келген. Кытай эч бир тарапка курал-жарак берген эмес жана эки багытта колдонулушу мүмкүн болгон товарлардын экспортун катуу көзөмөлдөйт.

Эске салсак, бүгүн, 23-октябрда Евробиримдик Орусияга каршы 19-пакет санкцияларды расмий бекиткен. Бул документте 2027-жылдан тарта Орусиядан суюлтулган жаратылыш газын импорттоого тыюу салуу каралган.

Мындан тышкары, Брюсселдин маалыматына караганда, Орусияга санкцияларды айланып өтүүгө жардам берген 45 уюмга чектөөлөр киргизилди. Алардын арасында Кытайдын бир нече компаниясы бар.