Литва Орусиянын аскердик учактары өлкөнүн аба мейкиндигин бузганын билдирди

Литванын президенти Гитанас Науседа Орусияга таандык аскердик учактар өлкөнүн аба мейкиндигин бузганын билдирди. Науседа билдирүүсүн X социалдык тармагында жарыялады.

"Бул кечте орус аскердик учактары Литванын аба мейкиндигин бузду. Бул эл аралык укуктун жана биздин аймактык бүтүндүктүн ачык бузулушу",- деп жазды ал.

Науседа Европа өлкөлөрүн аба коргонуу даярдыгын күчөтүүгө чакырып, Литванын Тышкы иштер министрлиги Вильнюстагы Орусия элчилигинин өкүлдөрүн чакырарын маалымдады. Ал эми Литванын Коргоо министрлигинин маалыматына караганда, Орусиянын Су-30 жана Ил-78 үлгүсүндөгү учактары 700 метрге чейин кирип, аба мейкиндигинде болгону 18 секунд кармалып, кайра чыгып кеткен.

Окуя болгон учурда Испанияга таандык эки Eurofighter Typhoon учагы абага көтөрүлүп, НАТОнун аба патрулу кызматын аткарган.

"Литванын ар бир сантиметри корголот жана зарыл болсо, коргонууга даяр. Бул окуя аймактагы коопсуздуктун реалдуулугун дагы бир жолу көрсөттү",- деп айтылат министрликтин билдирүүсүндө.

Буга чейин Орусиянын учактары Эстониянын, Польшанын жана Румыниянын аба мейкиндигин да бузганы кабарланган.