Өзбекстандан келген журналисттер Мадыген геопаркы менен таанышты

Баткен облусуна таанышуу жана кызматташтыкты өнүктүрүү максатында Өзбекстандан келген журналисттер тобу Мадыген геопаркына саякат жасашты. Бул тууралуу облустук өкүлчүлүктөн билдиришти.

Сапардын алкагында коңшу өлкөдөн келген телеканал, радио, гезит жана интернет басылмаларында иштеген журналисттер Мадыгендин түркүн түстүү тоолору менен ачык асман алдындагы табигый кооз көрүнүшүнө күбө болушту.

Журналисттерге аймактын геологиялык өзгөчөлүктөрү, туристтик жана илимий мааниси тууралуу маалымат берилди. Меймандар Мадыгендин уникалдуу жаратылыш көрүнүштөрүн сүрөткө тартып, эстелик үчүн сүрөткө түшүштү.

Өзбекстандык журналисттер бул аймак Борбор Азиядагы экотуризмди өнүктүрүүдө жана маданий-гуманитардык байланыштарды чыңдоодо маанилүү роль ойной тургандыгын белгилешти.

Мындай сапарлар эки өлкө ортосундагы достук жана маалыматтык кызматташтыкты чыңдоого, ошондой эле облустун туристтик дараметин кеңири таанытуу максатын көздөйт.