"Күрдистан" жумушчу партиясы Түркиядан күчтөрүн чыгарып кетерин жарыялады

"Күрдистан" жумушчу партиясы Түркиядагы ишмердүүлүгүн толугу менен токтотконун жарыялады. Бул тууралуу чет элдик басылмалар жазышууда.

"Жакынкы Чыгышта болуп жаткан чыр-чатактар ​​жана согуштар Түркиянын келечегине да, күрд калкына да олуттуу коркунуч келтире баштады. Ошондуктан биз бардык күчтөрүбүздү Түркиянын аймагынан чыгарып кетүүнү чечип жатабыз", - деп билдирүү тараткан аталган партия.

Түркия бийлиги тарабынан террористтик уюм деп табылган партия бардык күчтөрүн Түркиядан Түндүк Иракка чыгарып кетери айтылууда.

Айта кетсек, май айында "Күрдистан" жумушчу партиясы өз ишин токтотуу чечимин кабыл алганын жарыялаган.

1980-жылдардан бери уюм күрд калкынын автономиясы жана укуктары үчүн түрк мамлекетине каршы куралдуу күрөш жүргүзүп келет. Бул чыр-чатак он миңдеген адамдардын өмүрүн алды жана аймактагы эң узакка созулган чыр-чатактардын бирине айланды.

Күрддөр негизинен Түркияда, Сирияда, Иракта жана Иранда жашаган эң ири мамлекетсиз этникалык топ. Алардын саны бир гана Түркияда 15 миллиондон ашат.