Судан: Козголоңчулар бир нече айга созулган курчоодон кийин Эль-Фашер шаарын басып алышты

Судандагы козголоңчулар бир нече айга созулган курчоодон кийин Эль-Фашер шаарын басып алганын жарыялашты. Бул жерде 300 миңге жакын адам ачарчылыктан жапа чегип келген.

Шаардын козголоңчуларга өтүшү судандык армия үчүн чоң сокку болуп эсептелет, анткени Эль-Фашер — алардын Дарфур аймагындагы акыркы таяныч пункту эле. Мунун натыйжасында козголоңчулар аймакты толугу менен өз көзөмөлүнө алышкан. Судандын армиясы бул маалымат боюнча азырынча эч кандай комментарий бере элек.

БУУнун өзгөчө кырдаалдар боюнча координатору Том Флетчер жекшемби күнү Эль-Фашерден келген кабарларга терең тынчсыздануусун билдирип, Дарфур жана бүт Судан боюнча ок атышууну дароо токтотууга чакырды.

"Соттолгон жүз миңдеген тургундар аткылоолорго кабылып, ачарчылыкта жашап, азык-түлүккө, медициналык жардамга жана коопсуздукка жетүү мүмкүнчүлүгүнөн ажырап жатышат", — деди Флетчер.

Эль-Фашер шаары акыркы жарым жылдан ашуун убакыттан бери курчоодо болгон. Козголоңчулар үзгүлтүксүз түрдө армиянын жана жай тургундардын позицияларына ок чыгарып турушкан. Маалым болгондой, согуш аракеттеринин натыйжасында 300 миңге жакын адам курчоодо калган.

Учурда армия жана ага союздаш куралдуу топтор шаардын айрым райондорун көзөмөлдөп турушат, бирок байкоочулардын баамында, алар бул позицияларды узакка сактап кала алышпайт.

Судан армиясы өлкөнүн түндүк жана чыгыш бөлүгүнүн көбүн көзөмөлдөйт, ал эми Эль-Фашер — Дарфурда өкмөттүк күчтөрдүн колунда калган акыркы ири шаардык борбор болгон.

Буга чейин козголоңчулар шаарды толук көзөмөлгө алышкандан кийин Эль-Фашерде өз өкмөтүн түзүү ниетин билдиришкен.