Нидерландда эртең парламенттик шайлоо болот

Нидерландда миграциялык саясат боюнча пикир келишпестиктерден улам өкмөт июнь айында тарагандан кийин мөөнөтүнөн мурда парламенттик шайлоо дайындалган. Эртең, 29-октябрда өлкө жарандары жаңы парламентти шайлоо үчүн добуш беришет. Бул тууралуу чет элдик басылмалар жазышты.

Маалым болгондой, соңку төрт өкмөт тең мөөнөтүн толук аткара албай, мөөнөтүнөн мурда шайлоого барган. Сурамжылоолорго ылайык, улутчул жана исламга каршы көз карашы менен белгилүү Герт Вилдерстин "Эркиндик партиясы" (PVV) алдыда келе жатат, бирок бир дагы партия өз алдынча өкмөт түзүүгө жеткидей көпчүлүк - 75 орунга жете албайт.

Шайлоо алдындагы кампанияда турак-жай кризиси, миграция саясаты жана саламаттыкты сактоодогу чыгымдар негизги темалар болду. Ipsos I&O изилдөө борборунун адиси Ашер ван дер Шелденин айтымында, соңку сурамжылоолор абдан таймаштуу жарышты көрсөтүүдө. PVV алдыда болгону менен, Жашыл Сол жана Эмгек партияларынын (GL–PvdA) биримдиги жана Демократтар 66 (D66) партиясы да ага жакын рейтингге ээ. Бирок PVV менен коалиция курууга башка партиялардын көбү каршы болгондуктан, Вилдерстин өкмөт түзүү ыктымалдыгы өтө төмөн.