Японияда апрель айынан бери аюунун кол салуусунан каза болгондордун саны 10го жетип, рекорд койду

Японияда быйыл апрель айынан бери аюулардын кол салуусунан каза тапкандардын саны 10 адамга жетип, тарыхтагы эң жогорку көрсөткүч катары катталды. Бул тууралуу өлкөнүн мамлекеттик NHK телеканалы кабарлады.

Маалыматка ылайык, өлкөнүн айыл жана шаар аймактарында аюулардын көбөйүшү боюнча Япон Айлана-чөйрө министрлиги расмий билдирүү тараткан. Акита префектурасындагы бир айылда өткөн жумада болгон соңку окуя менен каза болгондордун жалпы саны 10го жеткени айтылды.

Kyodo News агенттигинин маалыматына ылайык, Акита префектурасынын губернатору Кента Судзуки кырдаал боюнча атайын билдирүү жасап, кол салууларга каршы аракеттерде эл чарчаганын, аңчылардын саны азайып, көбү карып калганын белгиледи. Ал бул шартта Япониянын Өз алдынча коргонуу күчтөрүнөн логистикалык жардам сурай турганын билдирди.

Өлкөдө айрыкча июнь айынан бери түндүк аймактарда аюулардын туристтерге кол салышы, дүкөндөргө кирип кетиши жана мектептер менен парктарга жакын жерлерде көрүнүшү көбөйгөн.