Apple тарыхта капитализациясы 4 триллион доллардан ашкан үчүнчү компания болду

Apple корпорациясынын рыноктук наркы биринчи жолу 4 триллион доллардан ашты. Бул тууралуу Nasdaq биржасынын маалыматында айтылды.

Муну менен Apple тарыхта мындай көрсөткүчкө жеткен үчүнчү компания болуп калды. Буга чейин бул чекке Nvidia жана Microsoft компаниялары гана жеткен болчу.

Бишкек убактысы боюнча саат 19:43тө Apple акцияларынын баасы 269,71 долларды түзүп, компаниянын жалпы рыноктук баасы 4,001 триллионго жетти.

Аналитиктер компаниянын акцияларынын өсүшүн сентябрь айында чыккан iPhone 17 сериясына болгон күтүүсүз жогору суроо-талап менен байланыштырып жатышат.

"Apple азырынча жасалма интеллект тармагындагы мүмкүнчүлүктөрдү толук пайдаланбаса да, рыноктук капитализациянын 4 триллион босогосунан өтүшү Купертино жана жалпы технологиялык гиганттар үчүн бурулуш учур болду", - деди Wedbush Securities компаниясынын финансылык аналитиги Дэн Айвс Bloomberg агенттигине.

Анын айтымында, бул көрсөткүч Apple дүйнөдөгү эң ийгиликтүү керектөөчү брендди түзө алганын далилдейт.