Рио-де-Жанейродо полиция 60 банда мүчөсүн жок кылды 

Бразилиянын Рио-де-Жанейро шаарында кылмыштуу топторго каршы жүргүзүлгөн масштабдуу операция учурунда кеминде 64 адам каза болду. Бул тууралуу чет элдик басылмалар жазышты.

Каза болгондордун арасында 60 банда мүчөсү жана төрт укук коргоо органынын кызматкери бар.

Операцияга 2500дөн ашык укук коргоо органынын кызматкери катышууда. Акыркы маалыматтарга ылайык, 81 адам камакка алынган. Кармалгандардын арасында "Кызыл команданын" лидерлеринин бири, "Док" же "Аюу" деген ат менен белгилүү Эдгар Алвес де Андраденин каржылык башкаруучусу деп болжолдонгон шектүү бар.

Операция учурунда жергиликтүү үч тургун да атылган октон жаракат алып, Жетулио Варгас ооруканасына жеткирилген.

Рио-де-Жанейро бийлиги уюшкан кылмыштуулукка каршы күрөштүн алкагында үзгүлтүксүз операцияларды жүргүзүп турат. Азыркы операция шаардын тарыхындагы эң кандуу операция болуп саналат.