Трамп Япониядагы америкалык аскерлердин алдында адаттагы бийин аткарды (видео)

АКШ президенти Дональд Трамп Японияга болгон расмий сапарыннын алкагында АКШнын Аскер-деңиз күчтөрүнө таандык "Жорж Вашингтон" базасына барды. Ал жерде аскерлерге жолугуп, "Village People" тобунун белгилүү "Y.M.C.A." аттуу ырына өзүнүн белгилүү бийин аткаргандыгын чет элдик басылмалар жазышууда.

Трамптын бийи аскерлердин кубанычы менен коштолуп, көптөрү аны телефондоруна тартып алышты. Трамп буга чейин да ушул ырдын коштоосунда ар түрдүү иш-чараларда жана митингдерде бийлеп келет.

Американын лидери өлкөнүн күч-кубаты курал-жарактан эмес, күн сайын кызмат өтөп жаткан жөнөкөй аскер мырзалардан жана айымдардан көз каранды экенин белгиледи. Мындан тышкары, АКШ лидери Япония менен кеме куруу тармагында кызматташуу пландаштырылып жатканын айтты.

Айта кетсек, Трамп Японияда расмий иш сапары менен болуп, жаңы шайланган премьер-министр Санаэ Такаити жана өлкөнүн императору менен жолукту.