Gmail колдонуучуларына чукул эскертүү: 183 миллион сыр сөз жарыяланды

Gmail колдонуучулары болжол менен 183 миллион электрондук почта аккаунтун камтыган ири маалыматтык бузуунун курмандыгы болушу мүмкүн. Тараган маалыматтардын арасында электрондук даректер гана эмес, ошол аккаунттарга тиешелүү сыр сөздөр да бар экени белгилүү болду. Бул тууралуу чет элдик басылмалар жазышты.

Адистердин айтымында, бул хакерлерге Gmail гана эмес, ошол эле электрондук дарек менен катталган башка платформаларга да кирүүгө мүмкүнчүлүк берет.

Маалыматтардын жайылышы 2025-жылдын апрель айында болгон, бирок окуя жакында гана Have I Been Pwned аттуу маалымат бузууларды байкоочу сайт аркылуу аныкталган. Сайттын негиздөөчүсү, киберкоопсуздук адиси Трой Хант, маалыматтар ар түрдүү интернет булактарынан чогултулуп, бир базага бириктирилгенин түшүндүргөн. Бул платформа бүгүнкү күнгө чейин 917 маалымат бузууну жана 15 миллиарддан ашуун аккаунт маалыматын көзөмөлдөп келет.

Адистер Gmail колдонуучуларына дароо сыр сөздү алмаштырууну, ошондой эле эки баскычтуу коопсуздук функциясын иштетүүнү сунушташат. Google бул функция аркылуу колдонуучунун аккаунтун кошумча текшерүү кадамдары менен коргойт. Мындай учурда сыр сөз уурдалган күндө да аккаунтка толук кирүү мүмкүн болбойт. Киберкоопсуздук боюнча эксперттер акыркы мезгилде жасалма интеллект колдонулган маалыматтык чабуулдар көбөйүп жатканын да эскертишүүдө.