Президенттик администрацияда шайлоого даярдык көрүү боюнча республикалык штабдын жыйыны өттү

Бүгүн, 29-октябрда министрлер кабинетинин төрагасынын биринчи орун басары Данияр Амангелдиев Жогорку Кеңештин депутаттарын мөөнөтүнөн мурда шайлоону даярдоо жана өткөрүү боюнча уюштуруу-техникалык маселелерди чечүүдө шайлоо комиссияларына көмөк көрсөтүү максатында республикалык штабдын жыйынын өткөрдү.

Президенттик администрациянын маалымат кызматы билдиргендей, жыйындын жүрүшүндө Шайлоо жана референдум өткөрүү боюнча борбордук комиссиясынын төрагасы Тынчтык Шайназаровдун жана тышкы иштер министри Жээнбек Кулубаевдин баяндамалары угулду.

Белгиленгендей, Жогорку Кеңештин депутаттарын мөөнөтүнөн мурда шайлоодо мекендештердин добуш берүүсү үчүн 34 чет мамлекетте 100 шайлоо тилкеси ачылат.

Тийиштүү мамлекеттик органдар бир катар шаарларда тиешелүү даярдык иштерин жүргүзүп, адистерди окутуп, техникалык жабдууларды сыноодон өткөрүүдө. Мындан тышкары, эл аралык байкоочуларды чакыруу жана катышуу аракеттери жүрүп жатат.

Жыйында ошондой эле шайлоо процессине даярдыктар боюнча жергиликтүү бийлик өкүлдөрүнүн маалыматтары угулду.

Амангелдиев мөөнөтүнөн мурда парламенттик шайлоону сапаттуу уюштуруунун маанилүүлүгүн белгиледи.

"Алдыдагы шайлоо өлкөбүздүн демократиялык өнүгүүсүнүн маанилүү этабы. Учурда жүз миңдеген мекендештерибиз чет өлкөлөрдө иштеп, жашап жатышат. Алардын ар бири Кыргызстандын жараны катары өз добушун берүүгө жана өлкөбүздүн өнүгүшүнө салым кошууга укуктуу. Ошондуктан, алардын шайлоого катышуусун камсыз кылуу мамлекеттин түздөн-түз милдети. Биздин негизги максатыбыз - шайлоону ачык, мыйзамдуу, коопсуз өткөрүү. Ар бир жарандын добушу саналып, ар бир шайлоо участкасынын иши жогорку деңгээлде уюштурулушу маанилүү",- деди Данияр Амангелдиев.

Жыйындын соңунда тиешелүү мамлекеттик органдарга бир катар тапшырмалар берилди.