Газа: Израилдин соккусунан улам 100дөн ашык адам каза тапты

Газанын Саламаттык сактоо министрлигинин маалыматы боюнча, Израилдин 28-октябрдын кечинде башталган аба соккуларынын натыйжасында 104 адам каза болду. Курман болгондордун арасында 46 бала жана 20 аял бар. Ошондой эле 253 палестиналык жаракат алды.

Израилдин армиясы билдиргендей, алар бир катар аба соккуларынан кийин ок атышпоо режимин сактоо үчүн кайтып жатышат. Аскердик жетекчиликтин айтымында, бул соккулардын максаты Газа секторундагы террордук элементтерди жок кылуу болгон.

"Израилдин Коргоо армиясы ок атышпоону сактоону улантат жана анын бардык бузулуусуна катуу жооп кайтарат", - деп айтылат маалыматта.

Кечээ The Times of Israel басылмасы маалымдагандай, ХАМАС кыймылы Газанын түштүгүндөгү Рафах шаарында израилдик аскерлерге ок чыгарган. Бул окуядан кийин Израилдин премьер-министри Биньямин Нетаньяху Газа секторуна аба соккуларын жасоо тууралуу буйрук берген. Бирок ХАМАС бул айыптоолорду четке кагууда.

Associated Press агенттигинин маалыматына ылайык, Израил бул аракеттери тууралуу АКШны алдын ала кабардар кылган.