Кариб деңизине жеткен "Мелисса" бороону болжолдуу 50дөй адамдын өмүрүн алды

28-октябрда Кариб деңизине жеткен тарыхтагы эң күчтүү бороондордун бири "Мелиссанын" кесепетинен кеминде 49 адам каза болду деп билдирет чет элдик басылмалар.

Маалыматка ылайык, Гаитиде 40 адам каза болуп, дагы 10 адам дайынсыз болуп жатат. Ямайкада 8 адам, Доминикан Республикасында 1 адам каза болуп, дагы 1 киши дайынсыз жоголгон.

"Мелисса" бороону Куба, Ямайка жана Гаитини чоң кыйроолорго алып келди. Табият кырсыгынын айынан миңдеген адамдар электр энергиясынан ажырап, айрым аймактагы жергиликтүүлөр эвакуацияланды.

Бул бороон Атлантика тарыхындагы эң күчтүү урагандардын бири болуп эсептелет. Ал 28-октябрда Ямайкага "Саффир–Симпсон" шкаласы боюнча бешинчи, эң жогорку категориядагы бороон катары келген. Шамалдын ылдамдыгы айрым учурларда саатына 295 чакырымга чейин жеткен.

Кубанын жээгине жакындаганда "Мелисса" үчүнчү категориядагы бороонго айланып, 29-октябрда өлкөдөгү баш калкалоочу жайларда 735 миңдей адам калган. Азыркы учурда бороондун күчү экинчи категорияга чейин төмөндөгөн.

29-октябрдын ортосунан тарта бороон Түштүк-Чыгыш Багам аралдарына таасир эте баштаган. Болжол менен бүгүн, 30-октябрда "Мелисса" Бермуд аралдарынын батыш жагынан өтөт деп күтүлүүдө.