Гүлчөгө расмий түрдө шаар макамы берилди

Кечээ, 29-октябрда Ош облусунун Алай районундагы Гүлчө айыл аймагына расмий түрдө шаар макамын ыйгаруу боюнча салтанаттуу иш-чара өттү. Бул тууралуу облустук өкүлчүлүктөн билдиришти.

Иш-чарага облус башчысы Элчибек Жантаев, Мамлекеттик кызмат жана жергиликтүү өз алдынча башкаруу иштери боюнча мамлекеттик агенттигинин директорунун орун басары Эрмек Иргебаев, жергиликтүү бийлик өкүлдөрү жана аймактын тургундары катышты.

Жантаев Гүлчө шаарына макам берилиши Алай районунун социалдык-экономикалык өнүгүүсүндө маанилүү кадам экенин белгилеп, Алай районунда жүрүп жаткан иштер боюнча маалымат берди.

Иш-чаранын алкагында “Гүлчө шаары” деген жазуусу бар стелланын ачылышы болуп өттү жана аймактык кызматтарга жаңы техникалар тапшырылды. Ал эми алдыда облустук өнүктүрүү фондунан Гүлчө шаарына дагы эки атайын техника сатып берилерин облус жетекчиси маалымдады.

Эске салсак, Гүлчө айыл аймагына шаар макамын берүү тууралуу мыйзам 25-сентябрда Жогорку Кеңеш тарабынан кабыл алынды. Көп өтпөй өлкө башчысы Садыр Жапаров мыйзамга кол койду.