"Кыш кандай болору белгисиз". Электр жарыгын берүүдө көйгөй жаралабы? (видео)

Энергетика министринин биринчи орун басары Эмилбек Ысманов мамлекеттик телеканалдардын бирине курган маегинде кышында өлкөдө электр жарыгы өчүрүлүшү мүмкүн экенин жашырган жок.

Ал Токтогул суу сактагычында суунун көлөмү былтыркыдан аз экенин, таагыраагы, былтыр 13,2 миллиард куб суу топтолсо, быйыл андан 1 миллиард 922 миллион кубга аз экенин айтты. Ысманов кышында электр жарыгы өчүрүлбөшү үчүн тиешелүү иштер жүрүп жатканын билдирди.

"Биз ар бир облус боюнча лимиттерди киргизгенбиз. Анан электр энергиясын колдонуу өлчөмүнөн көз каранды болот. Кыш кандай келет, бул бизге белгисиз. Биз 4 миллиард 300 миллион киловатт-сааттык келишим түзгөнбүз. Анын 1 миллиард 700 миллиону Казакстан, 1 миллиард 180 миллиону Өзбекстан, 1 миллиард 200 миллиону Тажикстан, 255 миллиону Орусиядан алынат.

Алар айтылган электр энергиясын өз убагында толук берсе, анда кышында электр жарыгын өчүрбөй чыгып кеткенге мүмкүнчүлүгүбүз болот. Эгерде бул көрсөткүчтөр аткарылбай калса, бизге бир аз оор болуп калат",- деди ал.

Быйыл кышында өлкөдө электр жарыгы өчүрүлүп турабы? Бул шилтемеден окусаңыз болот.