Лувр музейин тоноого шектелип дагы 5 киши кармалды, зер буюмдар табылган жок

Францияда Лувр музейин тоноого байланыштуу дагы беш шектүү кармалды. Алар кечээ, 29 октябрда кечинде Париж аймагындагы ар кайсы райондордон бир убакта кармалганын RTL радиосу маалымдады.

Прокурор Лора Бекконун айтымында, шектүүлөрдүн жеке маалыматтарын жарыялоого азырынча эрте. Бирок бул операция учурунда уурдалган зер буюмдар табылган жок.

Эске салсак, буга чейин эки шектүү кармалганы маалымдалган. Алардын бири 34 жаштагы Алжир жараны болуп, Руасси аэропортунан Алжирге жөнөмөкчү болгон учурда колго түшкөн. Экинчи шектүү 39 жаштагы француз жараны. Экөөнүн тең ДНК издери окуя болгон жерден жана скутерлерден табылган. Прокуратура кармалган 2 шектүү күнөөлөрүн мойнуна алышканын билдирди.

Уурулук 19-октябрда болгон. Кылмышкерлер курулуш жүк көтөргүчү менен музейдин Аполлон галереясына кирип, бир нече тарыхый зер буюмдарды уурдап кетишкен. Арасында Наполеондун жубайы Мари-Луизанын, Мария-Амалиянын жана Гортензия де Богарненин коллекцияларынан баалуу асыл буюмдар бар. Зыян көлөмү 88 миллион евро деп эсептелет.