Бишкекте өспүрүмдөрдүн катышуусунда дагы жол кырсыгы катталды

Бүгүн, 30-октябрга караган түнү саат 01:30 чамасында Бишкекте жол кырсыгынан алты өспүрүм жабыркады. Бул тууралуу милициянын кайгуул кызматы билдирди.

Маалым болгондой, Осмонкул көчөсүнөн Hyundai Sonata унаасынын айдоочусу башкаруусун жоготуп, трансформатор жайгашкан күркөнү жана үйдүн тосмосун сүзүп алган. Кырсыктын натыйжасында унаадагы алты өспүрүм оор жаракат алып, ооруканага жеткирилди.

Алдын ала маалыматтарга караганда, унааны жашы жете элек айдоочу айдап баратканы айтылууда. Анын өздүгү такталып жатат. Унаа айып токтотуучу жайга коюлган.

Эскерте кетсек, мындан 1 күн мурун ЖЭБдин жанында өспүрүмдөрдүн катышуусунда жол кырсыгы катталып, 2 мектеп окуучусу каза тапты. Ал эми 18-октябрда Бөкөнбаев жана Абдрахманов көчөлөрүнүн кесилишинде 17 жаштагы жигиттин катшуусундагы жол кырсыгы катталып, 13 жаштагы баланын өмүрү кыйылган.

Милициянын кайгуул кызматы ата-энелерди өспүрүмдөрдү көзөмөлдөөгө чакырып келет.