Орусиялык режиссёрго "Достук" ордени берилди

Бүгүн, 30-октябрда Бишкектеги Ынтымак Ордодо министрлер кабинетинин төрагасы Адылбек Касымалиев Орусиянын Кыргызстандагы маданият күндөрүнүн алкагында Орусиянын маданият министри Ольга Любимова менен жолугушуу өткөрдү. Бул тууралуу өкмөттүн маалымат кызматы билдирди.

Маалыматка ылайык, иш-чаранын жүрүшүндө орусиялык көрүнүктүү режиссёр Никита Михалковго Кыргызстандын мамлекеттик сыйлыгы болгон "Достук" ордени тапшырылган. Өкмөт башчы Никита Михалковду 80 жылдык туулган күнү менен чын жүрөктөн куттуктап, анын дүйнөлүк кинематографияны өнүктүрүүгө кошкон зор салымын белгилеп, ага бекем ден соолук, түгөнгүс энергия, маданиятты өнүктүрүү жана эки өлкөнүн ортосундагы бир туугандык мамилелерди чыңдоо үчүн мындан ары да чыгармачылык ийгиликтерди каалаган.

Ошондой эле Касымалиев өз сөзүндө маданият күндөрүн өткөрүү эки өлкөнүн тарыхый байланышын чыңдоого салым кошуп жатканын айткан.