Дубай өзүнүн алгачкы расмий искусство музейин ача турганын жарыялады

Дубай өзүнүн алгачкы расмий искусство музейин түзөрүн жарыялады. Бул тууралуу Artnet басылмасы билдирди.

Музейдин имарат долбоорун белгилүү япон архитектору, Притцкер сыйлыгынын лауреаты Тадао Андо иштеп чыккан.

Музей Дубай булуңундагы атайын платформага курулат, ошондуктан сыртынан караганда имарат суу үстүндө калкып тургандай көрүнөт. Долбоордун дизайны суу, асман жана жарык сыяктуу табияттын элементтеринен шыктануу менен түзүлгөн. Ак түстөгү ийилген фасады кемени элестетип, күндүн батышындагы түстөрдү чагылдырат.

Алгачкы эки кабатта заманбап искусствонун көргөзмөлөрү, ал эми жогорку кабаттарда панорамалык терезелери бар ресторан жана лаунж-аймак болот. Ошондой эле музейде китепкана, окуу бөлмөлөрү жана ар түрдүү иш-чараларга арналган залдар ачылат.

Бул долбоор Дубайды дүйнөлүк маданий борборго айлантуу аракеттеринин бир бөлүгү болуп саналат. Музейдин так ачылыш күнү азырынча маалымдала элек.