КМШнын Чек ара ведомстволорунун жетекчилери "Барпы" чек ара заставасына сапар жасашты (фото)

Кыргызстанда өткөн КМШнын Чек ара аскерлеринин кол башчыларынын кеңешинин 91-отурумунун алкагында КМШнын чек ара ведомстволорунун башчылары Чек ара кызматынын Жалал-Абад облусу боюнча башкармалыгынын Кочкорбаев атындагы "Барпы" чек ара заставасына барышты.

"Барпы" чек ара заставасынын өздүк курамы кыргыз-өзбек мамлекеттик чек арасынын эң маанилүү тилкесинин бирин кайтарууга жооп берет.

Аймактын рельефтик өзгөчөлүктөрү — түздүк жана тоолуу жерлердин айкалышы — жеке курамдын кесипкөйлүгүнө жана даярдыгына кошумча өзгөчө талаптарды коёт.

2024-жылдын декабрында пайдаланууга берилген "Барпы" чек ара комплексинин курулушу заманбап көп функционалдуу инфраструктурага ээ. Анын курамына кызматтык жана жашоо үчүн бөлмөлөр, ашканалар, машыгуу залдары, мончо, жайкы ашкана, жеке курам үчүн жатаканалар жана футбол аянтчасын камтыган спорттук объектилер менен унаа токтотуучу жайы бар. Мунун бардыгы жеке курам күжүрмөн тапшырмаларды аткаруусуна жана ыңгайлуу жайда жашоосуна бардык шарттарды түзүп турат.

Меймандарды тосуп жатып "Барпы" чек ара заставасынын башчысы капитан Бекболсун Райимбеков УКМК төрагасынын биринчи орун басары, Чек ара кызматынын директору генерал-майор Алимбаевге мамлекеттик чек ара тилкесиндеги ыкчам кырдаал тууралуу баяндама берди.

Баяндамадан кийин генерал-майор Алимбаев баштаган делегация заставанын кызматтык жайларын кыдырып, өздүк курамдын кызмат өтөө жана жашоо шарты менен таанышып, аскер кызматчыларынын батирлеринин бирин көрүп чыгышты.

Сапардын жүрүшүндө заставанын курал-жарак арсеналына өзгөчө көңүл бурулду. Конокторго стандарттуу үлгүдөгү ок атуучу куралдардан тышкары, адистештирилген куралдар да көрсөтүлдү. Алардын катарында 7,62 мм AZ автоматтары, "Застава М91" снайпердик винтовкалары, "КОБРА" тынымсыз патрон берүү системасы менен жабдылган HP-7,62 штурмдук пулемёттору, ошондой эле TAG-7V2 танкка каршы гранатомёттору жана 69 тибиндеги кол гранатомёттору көрсөтүлдү.

Тактикалык учкучсуз учуучу аппараттар, жаңы үлгүдөгү байланыш каражаттар жана чек арадагы кырдаалга мониторинг жасаган атайын заманбап техникалык каражаттар КМШнын чек ара ведомстволорунун жетекчилеринин кызыгуусун арттырды.

ЧАККтын 91-отурумунун катышуучуларына кызматтык иттердин жабдуулары жана машыгуусу, ошондой эле ооруктук камсыздоонун өзгөчөлүктөрү көрсөтүлдү.

Мындан тышкары сапардын жүрүшүндө сутка аралыгында чек ара кызматын жетектөөдө жана күнү-түнү күжүрмөн даярдыкты камсыздоодо негизги иш-чаралардын ажырагыс бөлүгү болуп саналган мамлекеттик чек араны кайтарууга алууга кезектеги буйрук берүү аземи өттү.

Чек ара заставасына болгон сапардан кийин отурумдун катышуучулары Манас шаарына барып, аймактын спорттук өнүгүүсүндө маанилүү роль ойногон Борбор Азиядагы ири спорттук объектилердин бири болуп саналган "Барселона" футбол клубунун академиясынын инфраструктурасы менен таанышышты.

Бул жакта Казакстандан, Орусиядан, Тажикстандан, Түркмөнстандан жана Өзбекстандан келген жаш футболчулар тарбияланышат. Жаш спортчулардын чек ара аскерлеринин генералдары менен болгон жолугушуусу өзгөчө таасир калтырды. Генералдар окуу процесске жана балдардын жетишкендиктерине чын дилден кызыгып, алардын машыгуулары жана спорттук ийгиликтери тууралуу суроолорду узатышты.

Сапардын акыркы этабында катышуучулар "Мурас Юнайтед" футбол клубунун машыгуу комплексине барышты. Заманбап спорттук база машыгуучу жана жашай турчу имараттарды, кийим алмаштыруучу бөлмөлөрдү, бассейнди, тренажёрдук залды, ошондой эле көрүүчүлөр үчүн трибуналарды жана дүйнөлүк деңгээлдеги спортчуларды даярдаганга идеалдуу шарттарды түзгөн гибриддүү футбол аянтчасын камтыйт.