Instagram’дагы жаңылык: Reels жана Издөө алгоритмин колдонуучулар жөнгө сала алышат

Instagram колдонуучуларга Reels жана Издөө бөлүмдөрүнүн алгоритмин өз каалоосуна жараша өзгөртө алууга мүмкүнчүлүк берген жаңы функцияны тесттен өткрүп жатат. Бул тууралуу компаниянын жетекчиси Адам Моссери Threads платформасында билдирди.

Маалыматка ылайык, жаңы функция "Сиздин алгоритм" деп аталат жана колдонуучулар өздөрү кызыккан темаларын тандай алышат.

Функция аркылуу адамдар жаңы темаларды кошо алышат же тескерисинче, көргүсү келбеген контент түрлөрүн белгилеп, аларды өз лентасынан четтетишет. Алгачкы тест Reels бөлүмүндө өтүп, кийин Издөө барагына да жайылтылат.

Моссеринин айтымында, бул жаңылык Instagram’да жеке тажрыйбаны дагы да так жана кызыктуу кылууга багытталган. Функция азырынча чектелген колдонуучуларга гана жеткиликтүү, дүйнө жүзү боюнча качан ишке кирери белгисиз.