Садыр Жапаров өлкө билимдүү жаштарга муктаж экенин айтты

"Кыргызстан билими жетик, илими терең, ошону менен улуттук нарк-насилди урматтаган, дүйнөлүк ой жүгүртүүгө ээ жаштарга муктаж". Бул тууралуу бүгүн, 31-октябрда өлкө башчы Садыр Жапаров жогорку окуу жайлардын студенттерине президенттик стипендия тапшыруу аземинде айтты.

Мамлекет башчы аталган стипендия жөн гана материалдык колдоо эместигин, ал билими, чыгармачылыгы менен айырмалаган студенттерди шыктандыруу үчүн берилерин белгиледи. Жапаров президенттик стипендияны алып жаткан студенттерди куттуктап, өлкөдө билим тармагына көңүл бурулуп жатканын билдирди.

"Бүгүн биз өлкөбүздүн билим берүү системин эл аралык талаптарга жооп бергидей кылып жаңыртуунун аракетиндебиз. Анын ичинде жогорку окуу жайларда окутуунун сапатын арттырууга басым жасап жатабыз. Биздин максат – студенттердин билим алуусуна гана эмес, дүйнөлүк атаандаштыкка жөндөмдүү болуусуна шарт түзүү. Мына ошондуктан, жогорку окуу жайлардагы илимий изилдөөлөрдү колдоого, жаштардын чыгармачыл жана коомдук ишмердүүлүгүн өнүктүрүүгө өзгөчө көңүл буруудабыз.

Бул багытта быйыл дагы айрым окуу жайлар өзгөчө макамга ээ болду. Мындай кадамдар аркылуу материалдык-техникалык базалары жаңыланып, академиялык жана каржылык өз алдынчалык макамы берилген окуу жайлардагы илимий изилдөөлөрдү өндүрүш менен тыгыз айкалыштырып, иш жүргүзүү талаптары катуу коюлууда",- деди президент.