Шашылыш билдирүү: Өлкө аймактарында үшүк жүрүшү күтүлөт

Кыргызгидромет кызматы билдиргендей, өлкө аймактарында 4-5-ноябрь күндөрү аба ырайы кескин өзгөрүлүшү күтүлөт.

Бул күндөрү мезгил-мезгили менен жамгыр жаап, карга айланышы, тоолуу райондордо кар жаашы, айрым жерлерде жаан-чачын катуу жаашы күтүлөт. Түнкүсүн жана эртең менен айрым жерлерде туман түшүшү мүмкүн.

Батыштан соккон шамалдын ылдамдыгы секундуна 4-9 метрден, айрым жерлерде 15-20 метрге жетиши күтүлөт.

Тоо этектеринде жана тоолуу райондордо жолдор тоңголок жана тайгак болот. 4-5-ноябрларда жана 6-ноябрда түнкүсүн абанын температурасы төмөндөйт:

• Чүй өрөөнүндө түнкүсүн -1…-6, күндүз 0… +5
• Талас өрөөнүндө түнкүсүн -2…-7, күндүз 0…+5
• Ош, Жалал-Абад, Баткен облустарынын өрөөндөрүндө түнкүсүн 0…+5, күндүз 1…6 градус. Тоо этектеринде түнкүсүн -2…-7, күндүз -2 …+3
• Ысык-Көл ойдуңунда түнкүсүн -4 …-6, күндүз +1…+6
• Нарын облусунун дыйканчылык аймактарында түнкүсүн -4…-9, күндүз -1 …+4 градус болот.

Мындай туруксуз аба ырайы автоунаа, энергетика жана коммуналдык кызматтардын ишин жана жайыттарда малды кармоону кыйындатат. 6-ноябрда түнкүсүн жана эртен менен Ош, Жалал-Абад, Баткен облустарынын өрөөндөрүндө -1…-3 градус үшүк жүрүшү күтүлөт.