Орбан Путин менен Трамптын жолугушуусу тууралуу билдирүү жасады

Венгриянын премьер-министри Виктор Орбан 7-ноябрда Вашингтондо өтө турган АКШ президенти Дональд Трамп менен жолугушуусу Орусиянын лидери Владимир Путин экөөнүн Будапештте саммит өткөрүүсүнө себепчи болоруна ишене турганын билдирди. Бул тууралуу саясатчы Kossuth радиосуна берген маегинде айтты.

"Менимче, биз бул жолугушууга жакындай алабыз. Президент Трамп менен талкуулай турган маанилүү темалардын бири — Украинадагы тынчтык маселеси болот", — деди Орбан.

Ошондой эле ал АКШ менен Венгриянын ортосундагы экономикалык кызматташтыкты өнүктүрүү маселеси да талкууланарын кошумчалады. Анын айтымында, Ак үйдөгү жолугушууга карата экономика жана каржы тармагында бир катар келишимдер даярдалууда.

Эске салсак, 27-октябрда Орбан АКШ президенти Дональд Трамп менен жолугушууда Орусиянын мунай тармагына карата киргизилген санкцияларды да талкуулай турганын айткан. Анын пикиринде, Трамптын ошол кездеги жаңы чектөөлөрдү киргизүү чечими туура эмес болгон. Орбан бул маселеден чыгуунун жолун, айрыкча Венгрия үчүн табууга аракет кыларын белгилеген.