Чүйдө мыйзамсыз курулуш боюнча 800 миң сом айып пул салынды

Мамлекеттик архитектура-курулуш көзөмөлдөө департаментинин Чүй аймактык башкармалыгы тарабынан курулуш объекттерине карата көзөмөл жүргүзүлүүдө. Бул тууралуу Курулуш министрлиги кабарлады.

Маалыматка ылайык, текшерүүнүн жүрүшүндө Чүй облусунун Шопоков шаарынын Биринчи Май көчөсү 29 А дарегинде жайгашкан "ЛАХОР СТИЛ МИЛС" ЖЧКсынын ишканасында мыйзам бузуулар аныкталган. Буга чейин да аталган аймак боюнча текшерүү жүргүзүлүп, даяр продукцияны сактоочу кампаны куруу жана куйма цехин реконструкциялоо иштери тиешелүү долбоордук жана уруксат берүүчү документтери жок жүргүзүлгөнү маалым болгон.

Анын негизинде "Шаар куруу жана архитектура жөнүндө" мыйзамдын талаптарын сактабагандыгы үчүн административдик чаралар көрүлүп, 400 000 сом айып пул салынган. Айып пул белгиленген мөөнөттө төлөнбөгөндүктөн, кошумча 400 000 сом өлчөмүндө туум эсептелинди. Натыйжада, айып пулдун жалпы суммасы 800 000 сомду түзүп, материалдар Сокулук райондук мажбурлап аткаруу кызматына жөнөтүлдү.

Мындан тышкары, аймактык башкармалык сот органдарына өз алдынча курулган даяр продукция сактоочу кампаны бузуу жана куйма цехтин ишин тиешелүү уруксат документтери жана шайкештик акты алынганга чейин токтотуу талабы менен доо арызын берди.

Курулуш министрлиги бардык жарандарга жана уюмдарга объекттерди курууда шаар куруу талаптарын жана мыйзам-ченемдерин так сактоо зарылдыгын эскертет.