Казакстандын Ички иштер министрлиги да Екатерина Биволго издөө жарыялады

Казакстандын Ички иштер министрлиги Дмитрий Биволдун мурдагы жубайы Екатерина Биволго издөө жарыялады. Бул тууралуу казак басылмалары жазышты.

Маалыматка караганда, Екатерина Биволго карата камакка алуу түрүндөгү бөгөт чарасы колдонулган жана ал учурда издөөдө.

"Бул факты боюнча кылмыш иши козголгон. Тергөөнүн алдын ала баскычы уланууда", — деп айтылат маалыматта.

Башка маалыматтар тергөөнүн кызыкчылыгына байланыштуу жарыяланбай турганы кошумчаланды.

Белгилей кетсек, буга чейин Бишкек шаардык ички иштер башкы башкармалыгы Екатерина Биволго карата улуттар аралык (этностук) кастыкты козутуу беренеси боюнча кылмыш ишин козгогон. Ага сырттан айып коюлуп, камакка алуу түрүндөгү бөгөт чарасы тандалган жана издөө жарыяланган.

Эске салсак, социалдык тармактарда Дмитрий Биволдун мурдагы жубайы Екатеринанын ар кандай улут өкүлдөрүнө карата кемсинткен сөздөрдү айткан видеосу тараган.