"Мурас Юнайтед" командасы Чакырык Лигасынын чейрек финалына чыкты (фото, видео)

Манас шаарынан чыккан "Мурас Юнайтед" футбол командасы АФКнын Чакырык Лигасынын чейрек финалына чыкты.

Сергей Пучков жетектеген команда С тайпасында биринчи орунду ээледи жана түз эле плей-офф этабына жолдомо алды.

Кечээ, 31-октябрда Бишкекте өткөн тайпанын акыркы оюнунда "Мурас Юнайтед" Кувейттин "Аль-Араби" клубу менен беттешип, 1:1 эсебинде тең чыкты. Муну менен "Мурас Юнайтед" тайпада биринчи орунду камсыздап, чейрек финалга чыгууга мүмкүнчүлүк алды.

"Командабыз Азия футбол конфедерациясынын Чакырык Лигасындагы тайпалык этапты ийгиликтүү жыйынтыктап, кийинки баскычка жолдомо алды! Бул жетишкендик — оюнчулардын эмгеги, машыктыруучулардын стратегиясы жана күйөрмандардын чексиз колдоосунун жыйынтыгы! Алдыда дагы маанилүү беттештер күтүп турат. Командабызга ийгилик жана жеңиштерди каалайбыз", - деп жазды команда социалдык тармактагы баракчасына.