Дүйнө чемпиондугунда жеңишке жеткен балбандарга жаңы унаалар тапшырылды (видео)

Кыргызстандын күрөш федерациясы Загреб шаарында (Хорватия) өткөн Дүйнө чемпиондугунда байгелүү орундарды ээлеген спортчуларды жана алардын машыктыруучуларын сыйлады. Бул тууралуу федерациянын басма сөз кызматы билдирди.

Маалым болгондой, балбандарга жаңы унаалар тапшырылып, машыктыруучулар акчалай сыйлыктарга ээ болушту. Мындан тышкары эркин күрөш боюнча улуттук курама команданын башкы машыктыруучусу Азат Мирахимовго да федерация жана демөөрчүлөр тарабынан унаа берилди.

Федерациянын маалыматына ылайык, бул сыйлыктар спортчулардын жетишкендиктерин баалоо жана жаш балбандарды жаңы ийгиликтерге шыктандыруу болуп саналат.

Сыйланган балбандардын арасында Бекзат Алмаз уулу, Эрназар Акматалиев, Асан Жанышов, Нурзат Нуртаева жана Айпери Медет кызы бар.

Белгилей кетсек, ушул жылдын сентябрь айында Загребде өткөн Дүйнө чемпиондугунда Бекзат Алмаз уулу күмүш медаль уткан, Эрназар Акматалиев менен Асан Жанышов коло медалдын ээси болушкан. Айпери Медет кызы күмүш, ал эми Нурзат Нуртаева коло медаль тагынган.