Орусияда кыргызстандык аял мыкаачылык менен өлтүрүлгөн. Шектүү катары уулу кармалды

Екатеринбург шаарындагы паркта мыкаачылык менен өлтүрүлгөн 41 жаштагы аялдын сөөгү табылды. Бул тууралуу орусиялык басылмалар кабарлашты.

Маалым болгондой, окуя 20-октябрда болгон деп болжолдонууда. Маркумдун сөөгү 30-октябрда жүгүрүп бараткан адам тарабынан табылган. Ал полицияга кабар берген. Басылмалардын маалыматына караганда, каза тапкан аял мыкаачылык менен өлтүрүлгөн, кийими жана документтери болгон эмес. Тергөөчүлөр жабырлануучунун өздүгүн аныктап, шектүү катары анын 21 жаштагы уулун кармашкан. Ал күнөөсүн моюнга алган.

Учурда Орусиянын Кылмыш-жаза кодексинин "Кыйноо менен адам өлтүрүү" беренеси боюнча кылмыш иши козголгон. Тергөө иштери уланууда, экспертизалар дайындалып, шектүүнүн жана жабырлануучунун Орусияда мыйзамдуу жүргөндүгү текшерилүүдө.