2034‑жылы иш күндөрү 2 күнгө чейин кыскарышы мүмкүн

Microsoft компаниясынын негиздөөчүсү Билл Гейтс 2034‑жылы жасалма интеллекттин өнүгүшү менен адамдардын эмгек убактысы беш күндөн эки күнгө кыскарышы мүмкүн экенин айтты. Бул тууралуу Quartz басылмасы кабарлады.

Гейтстин пикири боюнча, жасалма интеллекттин тез өнүгүшү эмгек рыногун толук өзгөртөт. Ал жакынкы он жыл ичинде көптөгөн кесиптер адам катышпастан аткарыларын белгиледи, анткени нейрон тармактары жана автоматташтырылган системалар көптөгөн тапшырмаларды аткарат. Миллиардер бул процесстин адамдар үчүн коркунуч туудурбай турганын, тескерисинче, жаңы мүмкүнчүлүктөрдү ачарын кошумчалады.

"Келечекте адамдарга толук жумуш күнүн иштөө керек болбойт. Жасалма интеллект коомдун көптөгөн муктаждыктарын чечет, анын ичинде медицина, билим берүү жана психологиялык саламаттык тармагындагы дефицитти да чечет", — деди Гейтс.

Ал ошондой эле бул өзгөрүүлөрдүн натыйжасында компаниялар жумушчу күчтү натыйжалуу бөлүштүрүп, адамдар өз убактыларын эффективдүү колдонууга үйрөнөрүн белгиледи.

"Жаңы доордо адамдарга кеңседе күн сайын болуунун кажети жок, анткени жасалма интеллект системалары алардын ордуна көп иштерди аткарат", — деп кошумчалады ал.

Ошол эле учурда Гейтс жасалма интеллект глобалдык көйгөйлөрдү чечүүгө кызмат кылышы керектигин белгиледи.