Гизадагы пирамидалар комплексинин жанында Улуу Египет музейи ачылды (фото)

Каирдин Гиза районундагы пирамидалар комплексинин жанында Улуу Египет музейи ачылды. Ачылыш аземинде дрондор менен жарык-шоу уюштурулуп, анда асманга Кудайлар жана пирамидалар тартылган сүрөттөр көрсөтүлдү.

Музейдин курулушу 2005-жылы башталган жана ага 1 миллиард доллар жумшалган. Ал Гиза пирамидалары жана Сфинксинин жанында жайгашкан. Музей Египеттин туристтик секторун өнүктүрүү жана экономикага инвестиция тартуу боюнча өкмөттүн борбордук долбоору болуп саналат.

Музейдин аянты 24 миң чарчы метрди камтып, ал жерде өлкөнүн байыркы цивилизациясына таандык ири айкелдер жана тарыхый экспонаттар көрсөтүлгөн. Өкмөт музейдин аймагын жана Гиза платосун жакшырткан, жолдор асфальтталып, музейдин кире беришинде метро станциясы курулуп жатат. Каирдин түндүгүндө, музейден 40 мүнөттүк аралыкта, эл аралык Сфинкс аэропорту ачылган.

Музей менен пирамидаларды жалгаган көпүрө туристтерге электромобилдер менен өтүүгө мүмкүнчүлүк берет.

Музейде 12 негизги зал бар, ал 2024-жылы ачылган жана Доистордук доордон тартып Рим дооруна чейинки буюмдар экспозицияланган. Эки зал Тутанхамондун 5 миң экспонатын көрсөтөт, бул британ археологу Говард Картер 1922-жылы Тутанхамондун казынасын Луксор шаарынан тапкандан бери толук көрсөтүлгөн эмес.

Ачылыш аземине европалык жана араб падышалык үй-бүлөлөрдүн мүчөлөрү, ошондой эле премьер-министрлер жана Египет президенти Абдель Фаттах ас-Сиси катышты.

Өкмөт 2032-жылга чейин жыл сайын 30 миллион турист тартууну пландоодо. Музей 4-ноябрдан тарта ачылат. Алгачкы тесттик режимде музей октябрь айында ачылган жана ал Луврдан да чоң архитектуралык комплекс катары таанылган.

1992-жылы президент Хосни Мубарак жаңы музей куруу планын жарыялаган. Долбоорго 83 өлкөдөн 1550ден ашык архитектуралык фирмалар катышкан жана Heneghan Peng Architects жеңип чыккан. “Араб жазы” жана Мубарактын кызматтан кетүүсү 2011-жылы долбоорду үч жылга токтоткон. Эл аралык каржылоонун жардамы менен курулуш 2014-жылы кайра калыбына келтирилген. 2020-жылы COVID-19 пандемиясы долбоорду кайра токтоткон. 2022-жылдын аягында музей бөлүкчө ачылып, чакан экскурсиялык топторду кабыл алган.

Музей комплекси 100 миң чарчы метр аянтты ээлейт, ал 490 миң чарчы метрлик жерди камтып, анын 24 миң чарчы метри туруктуу экспозиция болуп саналат.

Архитекторлор музейди көлөмдүү үч бурчтук түрүндө долбоорлошкон, фасад жана тунук чатыр үч бурчтук мозаикадан жасалган. Бул кооздук пирамидалар менен шайкеш келтирилген. Египет өкмөтүнүн маалыматына караганда, долбоордун финалдык версиясына дүйнөнүн 13 компаниясы катышкан.