10 миллион долларлык алтын унитаз аукционго коюлат (видео)

Sotheby’s аукциондук үйү заманбап искусство тарыхындагы эң талкууланган чыгармалардын бири, Маурицио Каттеландын алтын унитазын сатууга даярданууда. Автор жаңы эмгегин "Америка" деп атаган.

The New York Times жазгандай, унитаз 18 караттык алтындан жасалып, болжол менен 100 килограммдык салмакта. Аукцион 18-ноябрда өтөт, старттык баасы болжол менен 10 миллион доллар, бирок аукцион күнүндө алтындын базар баасына жараша өзгөртүлүшү мүмкүн.

Бул эмгек 2016-жылы жаралган жана анын эки эле нускасы бар. Алардын бири 2017-жылы Marian Goodman галереясы аркылуу жеке коллекционерге сатылган. Sotheby’s компаниясынын вице-президенти Дэвид Гальперин эмгекти провокация катары кабыл албоону айтты.

"Каттелан — биздин заманбап доордун эң мыкты сүрөтчүлөрүнүн бири. Анын "Америка" чыгармасы ирониялык жана философиялык мааниге ээ буюм", - деди ал.