Оштогу Уркуя Салиева атындагы музейде улуттук аспаптар көргөзмөсү өтөт 

Сулайман-Тоо Улуттук тарыхый-археологиялык музей-комплексинин Уркуя Салиева атындагы музей-филиалында Маданият күнүнө карата 3-ноябрда “Улуттук аспаптар — мурастын үнү” аттуу көргөзмө өтөт. Бул тууралуу бүгүн, 2-ноябрда Маданият, маалымат жана жаштар саясаты министрлигинен билдиришти.

Маалым болгондой, иш-чаранын максаты кыргыз элинин улуттук музыкалык аспаптары аркылуу тарыхый жана руханий мурастарын таанытуу, маданий нарк-насилди сактап калуу жана жаш муундардын кызыгуусун арттыруу болуп саналат.

Көргөзмөдө комуз, кыл кыяк, чоор, добулбас сыяктуу элдик аспаптардын түрлөрү коюлат. Ар бир экспонат кыргыз элинин жашоо-тиричилигин, турмушун, күүсүн жана жан дүйнөсүн чагылдырат.

"Комуз — чертме аспап катары эл арасында кеңири тараган, ал эми кыл кыяк — жаа менен чертилүүчү, терең маанилүү күүлөрдү аткарган аспап катары белгилүү. Бул аспаптар бүгүнкү күндө да жандуу мурас катары бааланып, дүйнөлүк деңгээлде ЮНЕСКОнун тизмесине киргизилген", - деп айтылат маалыматта.