БШК Абдивали уулу Дамирбекти шайлоого талапкер кылып каттоодон баш тартты

Борбордук шайлоо комиссиясы 2-ноябрда Жогорку Кеңештин депутаттыгына көп мандаттуу №12 шайлоо округу боюнча өзүн-өзү талапкер катары көрсөткөн Абдивали уулу Дамирбекти каттоодон баш тартуу чечимин кабыл алды.

Мекемеден билдиргендей, ал №12 шайлоо округу боюнча парламенттик шайлоого катышуу жөнүндө арызын 23-октябрда БШКга тапшырган.

Жумушчу топ Абдивали уулу Дамирбекти шайлоо мыйзамынын талаптарына ылайык келбестигин аныктап, аны талапкер кылып каттоодон баш тартууну сунуштаган.

УКМКнын Чек ара кызматынын тиешелүү маалымкатына ылайык, ал шайлоо мыйзамында көрсөтүлгөн депутаттыка көрсөтүүнүн алдында республиканын аймагында акыркы 5 жылдан кем эмес туруктуу жашагандыгы тууралуу талапка жооп бербей тургандыгы аныкталган.

"Абдивали уулу Дамирбек 2022-жылдын 23-октябрынан тартып, 2023-жылдын 23-октябрына чейин Кыргызстандын аймагынан тышкары жалпысынан 232 күн жүргөн. Мындан тышкары, 2023-жылдын 23-октябрынан 2024-жылдын 23-октябрына чейин жалпысынан 242 күн өлкө аймагынан тышкары жүргөн",- деп белгиленген билдирүүдө.

Мындан улам БШК аны талапкер катары каттоодон баш тартты.