Ош шаарында жол кыймылын иреттөө боюнча иштер улантылууда

Ош шаарында жол кыймылын иретке келтирүү жана шаар тургундары үчүн ыңгайлуу шарттарды түзүү максатында бир катар иш-аракеттер жүргүзүлүүдө. Бул тууралуу шаардык мэриядан билдиришти.

Масалиев кең көчөсү менен Шакиров көчөлөрүнүн кесилишинде унаа кыймылынын өтүшү бир топ ыңгайсыздыктарды жаратып, бир нече жолу жол-транспорттук кырсыктар катталып келет.

Жол кыймылын жөнгө салуу жана кырсыктардын алдын алуу максатында Ош шаарынын мэри Жеңишбек Токторбаев тиешелүү кызматтарга тапшырма берип, аталган кесилишке айланма жол куруу боюнча долбоор иштеп чыгууну тапшырган.

Мэрдин тапшырмасынын негизинде, эки көчөнүн кесилишинде айланма жол куруу боюнча эскиздик долбоор иштелип чыкты.

Долбоор ишке ашырылса, аталган тилкедеги кыймыл иретке келип, шаардыктар жана айдоочулар үчүн бир кыйла коопсуз жана ыңгайлуу шарттар түзүлөт.