Каспий жээгинен 100дөн ашуун өлгөн тюлендер табылды 

Казакстандын Маңгыстау облусунун Түпкараган районундагы жээк сызыгын көзөмөлдөө учурунда Каспий деңизинин боюнан 112 тюлендин өлүгү табылганын облустун Экология департаменти билдирди. Бул тууралуу жергиликтүү ЖМКлар маалымдашууда.

Атап айтканда, Асан айылы менен Форт-Шевченко шаарынын ортосунан 39, ал эми Форт-Шевченкодон Баутиного чейинки аралыктан 73 тюлендин өлүгү табылган.

Буга чейин "Лада" басылмасы жергиликтүүлөргө таянып Баутино айылындагы жээкте алты тюлендин өлүгү жатканын, алардын айрымдары торго чырмалып калганын маалымдаган.

Каспийде тюлендердин кырылышы дээрлик жыл сайын болуп турат. Окумуштуулар ар түрдүү себептерди аташат, бирок көп учурда Кызыл китепке кирген бул жаныбарлардын так эмнеден өлгөнүн аныктоо мүмкүн болбой келет. Ошол эле учурда каспий тюленинин саны кескин азайып баратат.