Казакстанда мектеп программасына сууда сүзүү сабагын киргизүү пландаштырылууда

Казакстан мектептеринде дене тарбия предметине сууда сүзүү сабактарын киргизүү пландалууда. Бул жөнүндө Qazaq Aquatics федерациясынын башкы катчысы Дмитрий Баландин өкмөт жыйынында билдирди.

Анын айтымында, Дүйнөлүк саламаттык сактоо уюмунун маалыматы боюнча, 2024-жылы дүйнөдө 236 миңден ашык адам сууга чөгүп каза болуп, алардын 82 миңи 1-14 жаштагы балдар болгон.

Баландин калкты сууда сүзүү боюнча элементардык көндүмдөргө жана сууда коопсуз жүрүм-турум эрежелерине үйрөтүүнүн маанилүүлүгүн белгиледи. Ал программанын алкагында сууда сүзүү сабагы дене тарбия системине кирип, мектеп программасынын бөлүгү боло турганын айтты. Пилоттук долбоор 2026-жылы Алматы жана Астана шаарларында башталат.

Анын сөзүндө, демилге АКШ, Австралия жана Венгриянын тажрыйбасына таянат. Бул өлкөлөрдө балдарды мектептен баштап сууда сүзүүгө үйрөтүү ийгиликтүү иштейт. Долбоор балдарга сууда коопсуз жүрүм-турумду үйрөтүп, спортко кызыктыруу жана дени сак жашоо образын калыптандыруу максатын көздөйт.