"ART ДИАЛОГ" жыйыны: Театр тармагындагы улуттук диалог ийгиликтүү өттү

Кечээ, 4-ноябрда Маданият, маалымат жана жаштар саясаты министрлиги театр тармагындагы жетекчилер жана адистер үчүн "ART ДИАЛОГ" жыйынын өткөрдү. Бул тууралуу аталган мекемеден билдиришти.

Жыйынды маданият, маалымат жана жаштар саясаты министри Мирбек Мамбеталиев ачып, театр тармагынын учурдагы абалы, өнүгүү багыттары жана чыгармачылык менен санариптик процесстердин айкалышы тууралуу ой бөлүштү.

Мекемеден билдиришкендей, аянтчанын максаты - театр жана оюн-зоок мекемелеринин ишмердүүлүгүн талдоо, жаңы ыкмаларды сунуштоо жана тармактын келечектеги өнүгүү стратегияларын иштеп чыгуу болду.

Иш-чарага министрликтин жетекчилиги, театр жана оюн-зоок мекемелердин жетекчилери, көркөм жетекчилер, эксперттер жана чыгармачыл чөйрөнүн өкүлдөрү катышышып, иш-чаранын жыйынтыгы менен резолюция кабыл алынды.