АКШда жүк учагы кулап, 3 адам каза тапты

Транспорттук MD-11 үлгүсүндөгү жүк учагы Луисвилл шаарындагы аэропорттон учуп чыккан соң кулап түштү. Учак Гонолулуга багыт алган.

Алгачкы маалыматтарга ылайык, үч адам каза болуп, дагы 11 адам жаракат алганын Кентукки штатынын губернатору Энди Бешир маалымат жыйынында билдирди.

"Биз азырынча үч адамдын каза болгонун билебиз. Бирок бул сан көбөйүшү мүмкүн деп ойлойм. Видеону көргөндөр кырсыктын канчалык коркунучтуу болгонун түшүнүшөт",- деди Бешир.

UPS компаниясынын маалыматына караганда, учакта үч экипаж мүчөсү болгон.

WLKY телеканалы көрсөткөн видеодо учак канаты күйгөн абалда абага көтөрүлүп, жерге урунганда чоң жарылуу жана өрт чыккан. Кырсыктан кийин учуп-конуу тилкесинин артындагы бир нече имараттар да отко оронгонун Reuters жазды.

Маалыматтарга ылайык, жарылуу маалында учакта болжол менен 144 миң литр күйүүчү май болгон.