АКШ Сирия президентине каршы санкцияларды алып салуу үчүн БУУга кайрылды

АКШ Сирия президенти Ахмед аш-Шараага каршы санкцияларды убактылуу алып салуу боюнча БУУ Коопсуздук кеңешине резолюция сунуштады. Reuters агенттигинин маалыматына караганда, резолюция долбоору ошондой эле Сириянын ички иштер министри Анаса Хаттабга каршы санкцияларды алуу маселесин да карайт.

Агенттик белгилегендей, учурда долбоор кайсы убакта добушка коюлары белгисиз. Резолюцияны кабыл алуу үчүн кеминде тогуз добуш жана Орусия, Кытай, АКШ, Франция жана Британия тараптан вето коюлбашы керек.

Ахмед аш-Шараанын АКШга сапары ноябрдын башында белгилүү болду. Бул Сирия президентинин 1946-жылы көз карандысыздык алгандан бери Вашингтонго биринчи сапары болот деп күтүлүүдө. Сапарга даярдык көрүлүп жатканда Германиянын канцлери Фридрих Мерц Сирия президентин качкындарды кайтаруу боюнча сүйлөшүүлөр үчүн Германияга чакырды.