Каирде Садыр Жапаров Египет парламентинин өкүлдөр палатасынын спикери менен жолугушту

Бүгүн, 5-ноябрда Каир шаарында өлкө башчы Садыр Жапаровдун Египет парламентинин өкүлдөр палатасынын спикери Ханафи Али Жебали менен жолугушуусу болду. Бул тууралуу президенттин администрациясынан билдиришти.

Маалымдалгандай, жолугушуунун башында спикер Египет парламентинин бир жарым кылымдан ашык тарыхы жөнүндө айтып берген. Андан соң тараптар парламенттер аралык байланыштарды чыңдоо, келишимдик-укуктук базаны өркүндөтүү жана башка маселелерди талкуулашкан.

Ханафи Али Жебали Кыргызстандын президентинин эки тараптуу мамилелердин тарыхындагы биринчи расмий сапарын жылуу тосуп алып, Садыр Жапаровдун сапары эки өлкөнүн ортосундагы достукту жана өз ара түшүнүшүүнү чыңдоо үчүн зор мааниге ээ экенин белгилеген. Ал Садыр Жапаровдун терең урматтоонун белгиси болгон Африка континентине биринчи сапарын Египеттен баштап жасаган чечимин жогору баалаган.

Өз кезегинде Садыр Жапаров жылуу кабыл алуу жана көрсөткөн меймандостугу үчүн ыраазычылык билдирген. Ал Кыргызстан менен Египет элдеринин аралыгы алыс болгонуна карабастан, достук байланыштары жана жалпы руханий баалуулуктар бириктирип тураарын белгилеген. Президент ошондой эле достук боюнча депутаттык топторун түзүүнү, аны менен катар биргелешкен парламенттик форумдарды жана консультацияларды өткөрүүнү сунуштаган.

Өлкө башчы 30-ноябрда Кыргызстанда Жогорку Кеңештин депутаттарын шайлоо өтөрүн билдирип, Мисир парламентинин өкүлдөрүн аларга эл аралык байкоочу катары катышууга чакырган. Жолугушуунун соңунда Садыр Жапаров Ханафи Али Жебалини Кыргызстанга расмий сапар менен келүүгө да чакырган.