Айдоочуларды 14 айга чейин окутуунун себеби эмнеде?

Президенттин иш башкаруучусунун орун басары Бообек Салимжанов "Ала-Тоо 24" телеканалынын түз эфиринде өлкөдө жол кырсыгы боюнча көрсөткүч өсүп жатканын айтып, айдоочуларды окутуу тармагы реформага муктаж экенин билдирди.

Ал азыркы учурда жарандар айдоочулукка 2,5 ай гана окушарын белгилеп, бул аралыкта көп нерсени үйрөнүүгө жетишишпей жатканын айтты.

"2,5 айда болгону 10-12 гана сабак болот экен. Анда адам болгону унаага отуруп, алдын карап, алдыга жана артка айдаганды гана үйрөнөт экен. Биз болсо айдоочулукка окутууну өзгөртөлү деп жатабыз. Жок дегенде 1-2 ай унаанын түзүлүшү жөнүндө окутабыз. Эң эле жөнөкөйү унаанын дөңгөлөгү жарылып калса, аны алмаштырышты билишпейт. Себеби 2,5 айлык окууда муну үйрөтпөйт", - деди Салимжанов.

Айта кетсек, кийинки жылдан баштап айдоочулукка окуу 14 айга созулмакчы.