Изилдөө: Эркек жана аял мээлеринде жүздөгөн ген ар башкача иштейт

Жаңы илимий изилдөөлөрдүн жыйынтыгында эркек жана аял мээлеринде жүздөгөн гендер ар башкача иштээри аныкталды. Изилдөө The Conversation аркылуу жарыяланды.

Оксфорддогу La Trobe университетинин профессору Женни Грейвстин айтымында, эркек (XY) жана аял (XX) мээлеринде гендердин активдүүлүгү олуттуу деңгээлде айырмаланат.

Адистер бул айырмачылыктар гормондордон гана эмес, түздөн-түз генетикалык факторлордон келип чыгарын жана түйүлдүктүн алгачкы өнүгүү этабында эле башталарын айтышат. Изилдөөлөр көрсөткөндөй, аялдардын мээлеринде нейрондорго байланышкан гендер, ал эми эркектерде клетка кабыгы жана өзөк түзүлүштөрүнө тиешелүү гендер активдүү.

Гендердин иштешиндеги бул айырмачылыктар айрым оорулардын жыныска жараша ар башкача кездешишин түшүндүрөт. Мисалы, Альцгеймер оорусуна байланышкан гендер аялдарда активдүү болуп, бул дарт аларда эки эсе көп катталат. Ал эми эркектерге мүнөздүү SRY гени Паркинсон оорусунун өнүгүшүн тездетиши мүмкүн.