Кыргызстандан Сирияга 150 тонна гуманитардык жардам жөнөтүлдү (сүрөттөр)

Өлкө башчы Садыр Жапаровдун тапшырмасы менен сирия элине 150 тоннадан ашык гуманитардык жардам жеткирилди. Бул тууралуу УКМКнын басма сөз кызматы билдирди.

Маалыматка ылайык, жардам Улуттук коопсуздук мамлекеттик комитети, Кыргызстандын Тышкы иштер министрлиги жана Түркиянын компетенттүү органдарынын жардамы менен жөнөтүлгөн.

"Атайын өнөктүктүн алкагында Сирия тарапка керектүү азык-түлүк товарлары (ун, күрүч, кумшекер, өсүмдүк майы жана башка) жеткирилди. Бул гуманитардык акция мамлекет башчысынын жана кыргыз элинин тынчтыкты, коопсуздукту чыңдоого жана муктаж болгон өлкөлөргө гуманитардык колдоо көрсөтүүгө болгон берилгендигин тастыктады", - деп жазылган маалыматта.

Сирия өкмөтүнүн өкүлдөрү Сириянын президенти Ахмед Хуссейн аш-Шараанын жана сирия элинин атынан Кыргыз Республикасынын президентине жана элине ыраазычылык билдирген.