Швецияда "Labubu" куурчактарынан кооптуу химиялык зат табылды 

Швецияда жасалма "Labubu" куурчактарынан кооптуу химиялык зат табылды. Бул тууралуу Орусиянын РИА новости басылмасы жазган.

Швециянын химиялык азыктарды көзөмөлдөө агенттиги билдиргендей, өлкөдө сатылып жаткан "Labubu" куурчактарынан ден соолукка зыян алып келген диэтилгексилфталат химикатын табышкан. Табылган заттар тукумсуздукка алып келип, түйүлдүктүн өнүгүшүнө зыян келтириши мүмкүн экени айтылган.

Аталган химихат Швецияда 1990-жылдардын аягынан бери оюнчуктарда колдонууга тыюу салынган. Ошентсе да, айрым өлкөлөрдө бул зат пластикалык буюмдарды жасоодо колдонулуп келет.

"Жаш балдар өзгөчө сезгич болушат, себеби алардын денеси дагы деле өнүгүп жатат да. Балдар оюнчуктарды оозуна көп салышат, мындай учур химиялык заттарды жутуу коркунучун күчөтөт", - деген химиялык продуктыларды көзөмөлдөө агенттиги.

Labubu - тиштерин көрсөтүп күлүп турган жумшак оюнчук. Учурда ал Кыргызстандагы өспүрүмдөр арасында дагы белгилүү. Анын көлөмү кичинекей болгону менен башка оюнчуктарга салыштырмалуу баасы кымбат.