Филиппиндеги Калмаеги тайфунунан каза болгондордун саны 140 адамдан ашты

Филиппин аралдарынын борбордук жана түштүк бөлүгүн каптаган Калмаеги тайфунунун кесепетинен кеминде 140 адам каза болду. Дагы 127 адам дайынсыз болуп жатканы тууралуу AFP агенттиги жергиликтүү бийликке таянып билдирди.

Филиппиндин жарандык коргонуу улуттук башкармалыгы 114 адамдын каза болгонун ырастады, бирок бул сандын ичине Себу провинциясында катталган дагы 28 курмандык киргизилген эмес. Буга чейин Себу провинциясында 93 киши каза болуп, 26 адам дайынсыз болуп жатканы кабарланган. Дал ушул аймакка табигый кырсыктын негизги соккусу тийген.

Associated Press маалымдагандай, Филиппин президенти Фердинанд Маркос-кичүүсү өлкөдө өзгөчө кырдаал абалын жарыялады.

Филиппин бийлиги жээк аймактарынан дээрлик 400 миң адамды эвакуациялады. Деңиздеги толкундардын бийиктиги 4 метрге жеткен. Тайфун азыр Вьетнам тарапка жылып бара жатат.