Израил Египет менен чектешкен аймакты "жабык аскердик зона" деп жарыялады

Израилдин коргоо министри Исраэль Кац Израил менен Египеттин чек арасындагы аймакты "жабык аскердик зона" деп жарыялады. Бул тууралуу Израилдин Коргоо министрлиги маалымдаганын чет элдик басылмалар жазышты.

Маалыматка караганда, бул аймакта ок атуу эрежелери өзгөртүлүп, анда тыюу салынган зонага уруксатсыз кирген жана дрон операторлоруна же аткезчилерге зыян келтирүүгө аракеттенген адамдарды жок кылуу мүмкүн экени айтылат.

9-октябрда Израил менен палестиналык ХАМАС кыймылы Египет, Катар, АКШ жана Түркиянын ортомчулугу менен АКШ президенти Дональд Трамп сунуштаган тынчтык планынын биринчи этабын ишке ашыруу боюнча макулдашышкан. Газа секторунда ок атышууну токтотуу режими 10-октябрда күчүнө кирген.

Бирок 19-октябрда Израил ХАМАСтын аскердик объектилерине сокку уруп, тынчтык келишимин бузган. Израил бийлиги "биринчилерден болуп ХАМАС кол салган" деп билдирсе, кыймыл бул айыптоону четке каккан.

21-октябрда Дональд Трамп АКШнын Жакынкы Чыгыштагы союздаштары ХАМАС тынчтык келишимин бузган учурда Газа секторуна аскер киргизүүгө даяр экенин айткан. Анын айтымында, кырдаалды жөнгө салуу үчүн аскердик күчтөр колдонулушу мүмкүн.